यूपी में बा हमरे चुनाव

यूपी में बा हमरे चुनाव , मिलत ना बा केहू के भाव

जेका देखा उहइ करत आज नेताई हो

का का तोहके बताई हो राम

केहू बनल सपाई केहू भाजपाई हो

का का तोहके बताई हो राम


केहू धरम के नाम पे बांटे, केहू जाति के नाम पे छांटे

असली मुद्दा बेरोजगारी केहु ना उठाई हो

का का तोहसे बताई हो राम

जेका देखा उहइ करत आज नेताई हो

का का तोहके बताई हो राम


केहू पूछे यूपी में का बा, केहू बताए यूपी मे बाबा

सोसल मीडिया पे अब बा बस इहइ लडाई हो

का का तोहसे बताई हो राम

जेका देखा उहइ करत आज नेताई हो

का का तोहके बताई हो राम


बनि के दलितन के मसीहा, जे कह तारे वोटवा दीहा

होते चुनाव देखिहा जइहैं सब भितराई हो

का का तोहसे बताई हो राम

जेका देखा उहइ करत आज नेताई हो

का का तोहके बताई हो राम


आज दलित घर खाना खइहें, हिन्दू हिन्दू सब चिल्लइहें

मतलब पूरा भा कि दइहैं अछूत बनाई हो

का का तोहसे बताई हो राम

जेका देखा उहइ करत आज नेताई हो

का का तोहके बताई हो राम


जेकरा जेकरा टिकट मिलत बा, सब नेतन पे केस चलत बा

जे पहिले से अपराधी बा का करी भलाई हो

का का तोहसे बताई हो राम

जेका देखा उहइ करत आज नेताई हो

का का तोहके बताई हो राम


त सवाल ई बा कि केकरा के जितावल जाइ..हालांकि काबिल त केहू न बा लेकिन होइ के ई चाहीं कि..


जे देई हक,न देइके भिक्षा, जे दे ई रोजगार अउर शिक्षा

महंगाई के ई दानव जे भी मार भगाई हो

उहीं के दा जिताई हो राम

जे हिन्दू मुस्लिम दलित न कइके करीं भलाई हो

उहीं के दा जिताई हो राम..


रिश्वतखोरी सीनाजोरी, जे रोकी भ्रष्टाचार अउर चोरी

जे जनता के सेवक बनि के करे बस सेवकाई हो

उहीं के दा जिताई हो राम

जे हिन्दू मुस्लिम दलित न कइके करीं भलाई हो

उहीं के दा जिताई हो राम..


हर एक घर मा बिटिया बहिनी, देखा बानी सहमी सहमी

एनके सुरक्षा व्यवस्था पे जे ध्यान लगाई हो

उहीं के दा जिताई हो राम

जे हिन्दू मुस्लिम दलित न कइके करीं भलाई हो

उहीं के दा जिताई हो राम..

छोड के जाति धरम के किस्सा, जे देदीं सबके सबके हिस्सा

मानव धरम श्रेष्ठ बा जे ई बात बताई हो

उही के दा जिताई हो राम

जे हिन्दू मुस्लिम दलित न कइके करीं भलाई हो

उहीं के दा जिताई हो राम..

उहीं के दा जिताई हो राम..

Leave a Reply

Your email address will not be published.